Socialize

கண்டனங்கள், கோரிக்கைகள் மத்தியில் பிரதம நீதியரசருக்கெதிரான குற்றவியல் பிரேரணை விசாரணை ஆரம்பம்.

தாயகத்திலிருந்து விஜய்

பிரதம நீதியரசர் ஷிராணி பண்டாரநாயக்கா சமூகமளித்தார்.

பிரதம நீதியரசர் ஷிராணி பண்டாரநாயக்கா, இன்று அவருக்கு எதிரான குற்றவியல் பிரேரணையை விசாரணை செய்ய அமைக்கப்பட்ட பாராளுமன்றத் தெரிவுக் குழுவின் முன்னிலையில் ஆஜாரனார். இன்று (23.11.2012 வெள்ளிக் கிழமை) காலை 10.30 அளவில் பாராளுமன்றக் கட்டத் தொகுதியில் ஆரம்பமான பாராளுமன்றத் தெரிவுக் குழுவின் முதலாவது அமர்விற்கு பிரதம நீதியரசர் ஷிராணி பண்டாரநாயக்கா, சட்டவுரைஞர்கள் சகிதம் சமூகமளித்தார்.
அண்மையில் பாராளுமன்ற உறுப்பினர்களால் முன்வைக்கப்பட்ட பிரதம நீதியரசருக்கு எதிரான குற்றிவியல் பிரேரணை தொடர்பில் உள்ளுர் மற்றும் சர்வதேச தலைவர்களும் அமைப்புக்களும் கண்டனங்கள் முன்வைத்து வரும் நிலையில், விசாரணைகளை தற்காலிகமாக ஒத்திவைக்க பல முயற்சிகள் மேற்கொள்ளப்பட்ட நிலையில், திட்டமிட்டபடி பாராளுமன்றத் தெரிவுக்குழு இன்று (23.11.2012)கூடியதுடன், அதன் முன்னிலையில் பிரதம நீதியரசர் ஷிராணி பண்டாரநாயக்கா ஆஜாராகியுமிருந்தார்.
பல்வேறு சமூகப் பிரமுகர்களால் உருவாக்கப்பட்டுள்ள வெள்ளிக் கருத்துக்களத்தின் சார்பில் இக் குற்றப் பிரேரணை தொடர்பாக ஜயந்த தனபால் மற்றும் பேராசிரியர் சாவித்திரி ஆகியோர் வெளியிட்ட அறிக்கையில், “உயர்நீதி மன்றத்தால் தீர்மானிக்கப்பட்ட வழக்குகளில் தனது நிகழ்ச்சித் திட்டத்திற்கு இசைவான தீர்மானங்களை ஏற்றுக் கொள்ளும் அரசாங்கம் அந்த உயர்நீதிமன்றத்தின் தலைமை நீதிபதிக்கு எதிராக குற்ற விசாரணைப் பத்திரத்தை தாக்கல் செய்வது நல்லாட்சியின் முக்கிய கொள்கையை மீறும் நடவடிக்கை” எனத் தெரவிக்கப்பட்டுள்ளது.
மேலும், ஜனநாயக உரிமைகளைப் பாதுகாப்பதற்கான இயக்கம் வெளியிட்டுள்ள அறிக்கையில், கடந்த காலத்திலும் தற்போதும் பிரதம நீதியரசர்கள் தொடர்பில் முன்வைக்கப்பட்ட குற்றச்சாட்டுக்கள் தொடர்பில் விளக்கியிருப்பதுடன், அண்மைக்காலத்தில் நீதித்துறை மீது இடம் பெற்ற தாக்குதல்கள் குறித்தும் குறிப்பிட்டிருப்பதுடன், “இவ்விடயங்கள் யாவுமே முக்கியத்தவம் வாய்ந்தவை என்பதுடன், எமது நாட்டில் நீதித்துறையின் சுதந்திரம் பற்றிய கரிசனை கொண்டுள்ள யாரேனும் ஒருவரினால் உதாசீனம் செய்யப்படவும் முடியாது” எனவும் தெரிவிக்கப்பட்டுள்ளது.
குற்றப் பிரேரணையை விசாரிக்க நியமிக்கப்பட்ட பாராளுமன்றத் தெரிவுக் குழுவின் செயற்பாடுகளுக்கு இடைக்காலத் தடை உத்தரவு பிறப்பிக்குமாறு கோரி ரிட் மனுக்கள் மேன்முறையீட்டு நீதிமன்றத்தில் தாக்கல் செய்யப்பட்டிருந்தன. மேன்முறையீட்டு நீதிமன்றம் அம்மனுக்களை உயர்நீதிமன்றத்திற்கு பாரப்படுத்தியிருந்தது. இந்த மனுக்களை நேற்று (22.11.2012) விசாரித்த உயர்நீதிமன்ற நீதியரசர்கள் நிமல் காமினி அமரதுங்க, கே. சிறிபாலன், பியாஷட் டீப் ஆகியோர், “குற்றப்பிரேரணை தொடர்பில் மேன்முறையீட்டு நீதிமன்றத்தினால் சமர்ப்பிக்கப்பட்டுள்ள மனுக்கள் தொடர்பில் தீர்மானமொன்றுக்கு வரும் வரையில் பாராளுமன்றத் தெரிவுக் குழுவின் விசாரணைகளை தாமதப்படுத்துவது நல்லது” என்று பாராளுமன்றத்திற்கு பரிந்துரை செய்திருந்தார்கள்.
அத்துடன் உயர்நீதிமன்றம் “சட்ட மன்றம் மற்றும் நீதித்துறை ஆகிய இரு நிறுவனங்களின் தனித்துவம் மற்றும் கௌரவத்தைபாதுகாக்கும் வகையில் நாளை நடைபெற இருக்கும் தெரிவுக்குழுவின் விசாரணையை இடைநிறுத்துவது நல்லது” என்றும் பரிந்துரைத்திருந்தது.
ஆயினும் பிரதி சபாநாயகர் சந்திம வீரக்கொடி நேற்று மாலை (22.11.2012), உயர் நீதிமன்றப் பரிந்துரைகள் பாராளுமன்றத்திற்கு அறிவிக்கப்படவில்லை எனத் தெரிவித்திருந்தார்.
இதற்கிடையில், இலங்கை சட்டத்தரணிகள் சங்கத்தினர் சபாநாயகர் சமல் ராஜபக்ஷவை நேற்றுச் சந்தித்து, குற்றப்பிரேரணை தொடர்பில் மீள்பரிசீலனை செய்யுமாறு கோரியிருந்தார்கள். ஆயினும் சபாநாயகர், குற்றப் பிரேரணை பாராளுமன்ற நிகழ்ச்சி நிரலில் உள்ளடக்கப்பட்டுள்ளதால் குற்றப்பிரேரணையை மீள்பரிசீலனை செய்ய முடியாது எனத் தெரிவித்திருந்தார்.
இத்தகையதொரு நிலையிலேயே இன்று பிரதம நீதியரசரக்கெதிரான விசாரணையை மேற்கொள்ளும் பாராளுமன்றத் தெரிவுக்குழு பாராளுமன்றக் கட்டடத் தொகுதியில் கூடியது.
கொழும்பு நீதிமன்ற வளாகத்தில் இருந்து பாராளுமன்றத்திற்கு புறப்பட்ட பிரதம நீதியரசர், மலர்ந்த முகத்துடன் அனைவருக்கும் வணக்கங்களைத் தெரிவித்துக் கொண்டே சென்றார். ஆயினும் அங்கு கூடியிருந்த சட்டத்தரணிகள் மற்றும் பொது மக்கள் பிரதம நிதியரசரை நோக்கி “வாழ்க”(ஜெயவேவா) எனக் கோசமிட்டதுடன், பின்னர் குற்றப் பிரேரணைக்கு எதிரான அர்ப்பாட்டத்தலும்; ஈடுபட்டனர்.
பிரதம நிதியரசர் பாராளுமன்றக் கட்டத் தொகுதிக்குச் சமூகமளித்த வேளை, பிரதம நீதியரசர் விசாரணை நடைபெற்ற பாராளுமன்றக் கட்டடத் தொகுதிக்குள் ஊடகவியலாளர்கள் அனுமதிக்கப்படவில்லை. பாராளுமன்றத் தெரிவுக் குழுவின் முன்னிலையில் ஆஜாரிகிவிட்டு வெளியே வந்த பிரதம நீதியரசர் ஊடகயிவலாளர்களின் கேள்விகளுக்கு பதிலளிக்கவுமில்லை.
மீண்டும் பாராளுமன்றத் தெரிவுக் குழு டிசம்பர் மாதம் 4 ஆம் திகதி கூடும் எனத் தெரிவிக்கப்பட்டுகிறது.

Share This Post

DeliciousDiggGoogleStumbleuponRedditTechnoratiYahooBloggerMyspaceRSS