Socialize

யாழ்.பல்கலைக் கழகச் சம்பவங்கள் தோற்றுவித்துள்ள தொடர் போராட்டங்கள்.

யாழ்.பல்கலைக்கழக ஒன்றியத்தின் செயலாளரான ப.தர்ஷானந், கலைப்பீட மாணவ ஒன்றியத் தலைவர் க.ஜென மேனன், மருத்துவ பீட மாணவன் சுதர்சன், விஞ்ஞானபீட மாணவன் எஸ்.சொலமன் ஆகியோரே கைது செய்யப்பட்டு தடுப்புக் காவலில் வைக்கப்பட்டுள்ளார்கள்.

இது தொடர்பாக கருத்து வெளியிட்டிருந்த பொலிஸ் ஊடகப் பேச்சளார் பிராச்ந்த ஜெயக்கொடி “பல்கலைக்கழக மாணவர்கள் நால்வரும் விசாரணைக்கு உட்படுத்தப்பட்டுள்ளார்கள். தொடர்ந்து விசாரணை மேற்கொள்ள வேண்டியிருப்பதனால் அவர்களுக்கு 72 மணி நேரம் தடுப்புக் காவல் உத்தரவு பிறப்பிக்கப்பட்டுள்ளது.” எனத் தெரிவித்திருக்கிறார்.

மாணவர்களின் கைது தொடர்பாக முன்னர் கருத்து வெளியிட்டிருந்த பொலிஸ் ஊடகப் பேச்சளார் திருநெல்வேலியிலுள்ள “சிறிரெலோ” கட்சியின் அலுவலகத்தின் மீது மேற்கொள்ளப்பட்ட பெற்றோல் குண்டுத்தாக்குதல் மற்றும் மாவீரர் தின சுவரொட்டிகள் ஒட்டியமை என்ற குற்றச்சாட்டுக்களின் அடிப்படையில் நான்கு பல்கலைக்கழக மாணவர்களை கைது செய்யதுள்ளதாகவும் கைது செய்யப்பட்டவர்கள் வவுனியாவுக்க அழைத்துச் செல்லப்பட்டு விசாரணைக்க உட்படத்தப்பட்டுள்ளதாகவும் தெரிவித்திருக்கிறார். கடந்த புதன் கிழமை திருநெல்வேலியிலுள்ள சிறிரெலோ காரியாலயம் பெற்றோல் குண்டுத் தாக்குதலுக்கு உள்ளாகியிருந்தமை இங்கு குறிப்பிடத்தக்கது.

யாழ்.பல்கலைக்கழகத்தில் மாவீரர் தினத்தன்று மாணவர்கள் சுடரேற்றலாம் என அறிந்த பாதுகாப்பு தரப்பினர் பெருமளவு படையினரை அங்கு குவித்திருந்ததுடன் பல்கலைக்கழக ஆண்கள் விடுதிக்குள் சென்று சோதனை நடவடிக்கையில் ஈடுபட்டதாகவும் ஆனால் குறித்த நேரத்தில் பெண்கள் விடுதியிலும் வேறு இடங்களிலும் சுடரேற்றப்பட்டதாகவும் தெரிவிக்கப்படுகிறது. இதனையடுத்து பெண்கள் விடுதிக்குள் அத்துமீறி நுழைந்த பாதுகாப்பு படையினர் அங்கு சோதனை நடவடிக்கைகளை மேற்கொண்டதாகவும் தெரிவிக்கப்படுகிறது.

பாதுகாப்பு படையினரின் இந்த நடவடிக்கைகளுக்கு எதிர்ப்பு தெரிவிக்கும் வகையில் மாணவர்கள் மறுநாள் அமைதிவழிப் போராட்டத்தினை பல்கலைக்கழக வளாகத்திளுள் நடாத்தியதுடன் பிரதான வாசலூடாக வீதிக்கு நுழைந்த போது பாதுகாப்பு படையினர் தாக்குதல்களை மேற்கொண்டதாகவும் அதனால் சில மாணவர்கள் காயமடைந்ததுடன் ஏனைய மணாவர்கள் சிதறியோடியதாகவும் தெரிவிக்கப்படுகிறது. அங்கு நின்ற ஊடகவியலாளர் தாக்கப்பட்டதுடன் சம்பவ இடத்திற்குச் சென்ற பாராளுமன்ற உறுப்பினர் ஈ.சரவணபவனின் வாகனமும் சேதமாக்கப்பட்டுள்ளது.

இந்த சம்பவங்கள் குறித்து பொலிஸ் ஊடகப் பேச்சளார் பிரசாந்த ஜெயக்கொடி, “யாழ்.பல்கலைக்கழக மாணவர்களுக்கும் இராணுவத்தினருக்கும் இடையில் முறுகல் நிலை ஏற்பட்டதன் பின்பு மாணவர்கள் குழப்பம் விளைவிக்கும் வகையில் ஆர்ப்பாட்டங்களை மேற்கொண்டு வீதிகளில் வன்முறைகளைத் தூண்டும் வகையில் நடந்து கொண்டனர். இதனைக் கட்டுப்படுத்த பொலிஸார் தீவிரமாக செயற்பட்டு நிலைமையை சுமுகமாக்கினர். இவ்விடயத்தில் இராணுவம் தலையிடவில்லை.” எனக் கூறியிருக்கிறார்.

யாழ்.பல்கலைக்கழகத்தில் இடம் பெற்ற சம்பவங்களை அடுத்து யாழ்.பல்கலைக்கழக ஆசிரியர் சங்கமும் பல்கலைக்கழக ஊழியர்களும் அமைதிவழி கவனயீர்ப்பு போராட்டத்திலும் அரை நாள் பணிப்பகிஷ்கரிப்பிலும் ஈடுபட்டிருந்தனர். யாழ்.பல்கலைக்கழக மாணவர்கள் வகுப்பு பகிஷ்கரிப்பிலும் ஈடுபட்டதுடன் இராணுவம் பல்கலைக்கழக சூழலில் குவிக்கப்பட்டிருந்த நிலையில் மாணவர்கள் பல்கலைக்கழக விரிவுரையாளர்களால் பாதுகாப்பாக வீடுகளுக்கு அனுப்பியும் வைக்கப்பட்டனர்.

அதனைத் தொடர்ந்து நள்ளிரவில் குறித்த மாணவர்களின் வீடுகளுக்குச் சென்ற பொலிஸார் அவர்களைக் கைது செய்து விசாரணைக்காக வவுனியாவுக்கு கொண்டு சென்றதுடன் தடுப்புக்காவலில் வைத்து விசாரணைகளை மேற்கொண்டும் வருகிறார்கள். பயங்கரவாத தடைச்சட்டத்தின் கீழ் தடுத்து வைக்கப்பட்டுள்ள மாணவர்களை பயங்கரவாதப் புலானாய்வுப் பொலிஸார் விசாரணை செய்து வருவதாகத் தெரிவிக்கப்படுகிறது.

யாழ்.பல்கலைக்கழக சம்பவங்களுக்கு, அனைத்துப் பல்கலைக்கழக மாணவர் அமைப்பு கண்டனம் தெரிவித்திருந்ததுடன் தென்னிலங்கையில் பல்கலைக்கழக மாணவர்கள் ஆர்ப்பாட்டங்களை மேற்கொண்டுமிருந்தார்கள். மனித உரிமை அமைப்புக்களும் ஊடக சுதந்திரத்திற்கான அமைப்புக்களும் கண்டனம் தெரிவித்திருந்தன.

யாழ்.பல்கலைக்கழக சம்பவங்களை அடுத்து> நாளை செவ்வாய்க்கிழமை (04.12.2012) தமிழ் தேசிய மக்கள் முன்னணியும் தமிழ்த் தேசியக் கூட்டமைப்பும் ஒன்றிணைந்து ஆர்ப்பாட்டப் பேரணி ஒன்றை நடாத்தப் போவதாக அறிவித்திருக்கிறார்கள். தமிழரசுக் கட்சியின் துணைச் செயலாளர் ஊடகவியலாளர் மாநாட்டில் “மாணவர்களினதும் பொதுமக்களினதும் ஜனநாயக செயற்பாடுகளில் இராணுவத்தினரும் பொலிஸாரும் தலையிடக் கூடாது எனக்கோரி தமிழ் தேசிய மக்கள் முன்னணியினரின் ஏற்பாட்டில் நடைபெறவுள்ள ஆர்ப்பாட்டப் பேரணியில் த.தே.கூட்டமைப்பினரும் இணைந்து செயற்படுவார்கள்” எனத் தெரிவித்திருக்கிறார்.

மேலும் கடந்த 27 ஆம் திகதி இராணுவத்தினரும் பொலிஸாரும் பல்கலைக்கழகத்தினுள் அத்துமீறி பிரவேசித்து பல்கலைக்கழக மாணவர் மாணவியர்களைத் தாக்கியுள்ளனர். இந்த நடவடிக்கைகளுக்கு கண்டனம் தெரிவித்து மறுநாள் பல்கலைக்கழக மாணவர்கள் நடாத்திய அமைதியான செயற்பாட்டை குழப்பியதுடன்> கண்மூடித்தனமாகத் தாக்கியும் உள்ளனர். அத்துடன் இந்தச் சம்பவங்களைப் பார்வையிடச் சென்ற பாராளுமன்ற உறுப்பினர் ஈ.சரவணபவன் கடமைகளைச் செய்ய விடாது தடுக்கப்பட்டார். செய்தி சேகரிக்கச் சென்ற ஊடகவியலாளர்கள் தாக்கப்பட்டுள்ளனர். அதனைக் கண்டிக்குமுகமாக அமைதியான போராட்டத்தினை நடாத்தவதெனத் தீர்மானித்தோம் எனவும் தெரிவித்திருக்கிறார். அத்துடன் “கைது செய்யப்பட்ட பல்கலைக்கழக மாணவர்களை உடனடியாக விடுதலை செய்ய வேண்டுமெனவும் நாம் கோருகின்றோம்” எனவும் அவர் தெரிவித்திருக்கிறார்.

இவ்விடயம் குறித்து யாழ்.மாவட்ட பாராளுமன்ற உறுப்பினர் சுரேஸ் பிரமேச்சந்திரன் பத்திரிகைக்கு வழங்கிய விசேட பேட்டியில் “இறந்த ஆத்மாக்களுக்கு குறித்த தினத்தில் விளக்கேற்றி மரியாதை செலுத்தக்கூட முடியாத அளவுக்கு ஜனநாயகம் பறிக்கப்பட்டு இராணுவ அடக்குமுறைக்குள் வடக்கு கிழக்கு மக்கள் வாழுகின்றார்கள் என்பதற்கு அடையாளமாகவே யாழ்.பல்கலைக்கழக மாணவர்கள் மிலேச்சத்தனமாக தாக்கப்பட்ட சம்பவத்தை கடந்த வாரம் இலங்கைக்கு வந்திருந்த ஐ.நா. சபை பிரதிநிதிகளிடம் கூட்டமைப்பினராகிய நாங்கள் ஆதாரத்துடன் எடுத்துக்காட்டியிருக்கிறோம்” எனத் தெரவித்திருக்கிறார்.

த.தே.கூட்டமைப்பின் தலைவர் இரா.சம்பந்தன் பொலிஸ் மா அதிபருடன் தொடர்ப கொண்டு மாணவர்களை உடனடியாக விடுவிக்க நடவடிக்கை எடுக்குமாறு கோரிக்கை விடுத்திருக்கிறார். த.தே.கூட்டமைப்பின் யாழ்.மாவட்டப் பாராளுமன்ற உறுப்பினர் சுரேஸ் பிரேமச்சந்திரன் குடாநாட்டில் பதற்றமான சூழலை ஏற்படுத்த அரசு முயற்சி செய்து வருவதாகக் குற்றம் சாட்டியிருக்கிறார்.
மாணவர்கள் தாக்கப்பட்ட சம்பவத்தைக் கண்டித்தும் கைது செய்யப்பட்ட மாணவர்களை விடுவிக்கக் கோரியும்> யாழ்.பல்கலைக்கழ மாணவர் ஒன்றியம் காலவரையறையற்ற வகுப்பு பகிஷ்கரிப்பில் ஈடுபடவுள்ளதாக அறிவித்திருக்கிறது. தென்னிலங்கையில் பல்கலைக்கழக மாணவர்கள் ஆதரவுப் போராட்டங்களை நடாத்தப் போவதாகத் தெரிவித்திருக்கிறார்கள். கிழக்குப் பல்கலைக்கழக மாணவர்களும் ஆதரவுப் போராட்டத்தில் ஈடுபட வேண்டும் என்ற கோரிக்கையும் முன்வைக்கப்பட்டுள்ளது.

Share This Post

DeliciousDiggGoogleStumbleuponRedditTechnoratiYahooBloggerMyspaceRSS

11 Responses to யாழ்.பல்கலைக் கழகச் சம்பவங்கள் தோற்றுவித்துள்ள தொடர் போராட்டங்கள்.

  1. Pingback: James

  2. Pingback: Catherine

  3. Pingback: Sam

  4. Pingback: Willie

  5. Pingback: Cindy

  6. Pingback: GoodStuff

  7. Pingback: UpAllNight

  8. Pingback: WilliamO

  9. Pingback: LastChance

  10. Pingback: rimonabantexcellence site title

  11. Pingback: Gregory Smith