Socialize

வடக்கில் இராணுவத்தில் சேர்க்கப்பட்ட பெண்களை உடனடியாக விடுதலை செய்யப்பட வேண்டும். – பொது எதிர்க்கட்சித் தலைவர்கள் கோரிக்கை.

தாயகத்திலிருந்து விஜய்

வடக்கில் இராணுவத்தில் சேர்க்கப்பட்ட தமிழ்ப் பெண்கள் வர்த்தமானி அறிவித்தல் இன்றியும் முறையான நடவடிக்கைகளின் அடிப்படையிலும் சேர்த்தக் கொள்ளப்படவில்லை. எனவே அவர்களை உடனடியாக விடுவிக்க வேண்டும். தேவையெனின் வர்த்தமானி அறிவித்தலின் ஊடாக உரிய முறைகளைப் பின்பற்றி தமிழ்ப் பெண்கள் விரும்பினால் அவர்களை இராணுவத்தில் சேர்த்துக் கொள்ளலாம் என ஜனநாயக மக்கள் முன்னணியின் பிரதித் தலைவர் ந.குமரகுருபரன் கோரிக்கை விடுத்திருக்கிறார்.
கொழும்பில் அமைந்துள்ள எதிர்க்கட்சித் தலைவர் அலுவலகத்தில் “பொது எதிர்க்கட்சிகளின் கூட்டு” நடாத்திய செய்தியாளர் மாநாட்டில் ஜனநாயக மக்கள் முன்னணியின் பிரதித் தலைவர் ந.குமரகுருபரன் இவ்வாறு கோரிக்கை விடுத்திருக்கிறார். அத்துடன் பொது எதிர்க்கட்சிகளின் தலைவர்களும் இவ்வாறு கோரிக்கை விடுத்திருக்கின்றனர்.
செய்தியாளர் மாநாட்டில் பேசிய ஜனநாயக மக்கள் முன்னணியின் பிரதித் தலைவர் ந.குமரகுருபரன், கிளிநொச்சியிலும் முல்லைத்தீவிலும் அப்பாவி தமிழ் பெண்கள் எந்தவிதமான முறைமைகளும் பின்பற்றப்படாமல் இராணுவத்தில் சேர்க்கப்பட்டுள்ளனர். யுத்தத்தின் பின்னர் சரணடைந்த அல்லது கைது செய்யப்பட்ட முன்னாள் போராளிகள் புனர்வாழ்வளிக்கப்பட்டு பெற்றோரிடம் ஒப்படைக்கப்படுவார்கள் என்று முன்னர் கூறப்பட்ட போதும், தற்போது பலவந்தமாக இராணுவத்தில் நேர்க்கப்படுகின்றனர். முன்னர் கைது செய்யப்பட்ட போது அழுத பெற்றோர் தற்போதும் அழுதுகொண்டிருக்கிறார்கள் எனத் தெரிவித்தார்.
செய்தியாளர் மாநாட்டில் குமரகுருபரன் தொடர்ந்து பேசுகையில், இந்த பெண்கள் அழுதுகொண்டிருந்த நிலையில் இழுத்தச் சென்றுள்ளதாக தெரிவிக்கப்படுகின்றது. இது தொடர்பில் அல் ஜசீரா கேள்வி எழுப்பியுள்ளது. அதற்குப் பெற்றோரை விட்டுப் பிரிவதால் இந்தப் பெண்கள் அழுததாக தெரிவிக்கப்படுகிறது. அவ்வாறாயின் பெற்றோரைப் பிரிய வரும்பாத பெண்களை ஏன் கட்டாயப்படுத்தி இராணுவத்தில் சேர்த்துக் கொள்ள வேண்டும் என்ற கேள்வியையும் எழுப்பியுள்ளார்.
செய்தியாளர் மாநாட்டில் கருத்து வெளியிட்ட தமிழ்த் தேசியக் கூட்டமைப்பு பாராளுமன்ற உறுப்பினர் சுமந்திரன், வடக்கில் பெண்கள் எந்த விதமான முறையும் பின்பற்றப்படாமல் இராணுவத்தில் சேர்க்கப்பட்டுள்ளனர். வர்த்தமானி அறிவித்தலும் வெளியிடப்படவில்லை. வீடுகளுக்குச் சென்று அழுத்தம் கொடுத்தே சேர்த்துள்ளனர். அத்துடன் அவர்களுக்கு இராணுவப் பயிற்சி அளிக்கப்படமாட்டாது என்றும் கூறப்பட்டுள்ளது. அப்படியானால் அவர்கள் என்ன சேவைக்காக சேர்க்கப்பட்டுள்ளனர் என்று கேட்கிறோம். இது சட்டத்திற்கு முரணான வகையில் மேற்கொள்ளப்பட்ட நடவடிக்கை எனவும் தெரிவித்திருக்கிறார்.
இதேவேளை, இராணுவத்தில் சேர்க்கப்பட்ட தமிழ்ப் பெண்களில் சிலர் தப்பியோடியதாகவும், அந்தப் பெண்கள் துன்புறுத்தப்பட்டதாகவும் அடைத்து வைக்கப்பட்டதாகவும் தெரிவிக்கப்பட்ட செய்திகள் உண்மையற்றவை என இராணுவப் பேச்சாளர் தெரிவித்திருப்பதுடன், இராணுவத்தில் சேர்க்கப்பட்ட பெண்களில் 6 பேர் சுய விருப்பின் பேரில் விலகிச் சென்றுள்ளதாகத் தெரிவித்திருக்கிறார்.
இது குறித்து கருத்துத் தெரிவித்த கூட்டமைப்பு பாராளுமன்ற உறுப்பினர் எஸ்.சிறிதரன், இராணுவத்தில் சேர்க்கப்பட்ட பெண்களில் 3 பேர் தாம் ஏமாற்றப்பட்டு இராணுவத்தில் சேர்க்கப்பட்டதாகக் கூறி அதிலிருந்து விலகிச் சென்றுள்ளதாகவும், அவர்கள் ஒரு நாள் வரை தடுத்து வைக்கப்பட்டு பின்னர் வீடுகளுக்கு அனுப்பப்பட்டதாகவும் தெரிவித்திருக்கிறார். அலுவலகப் பணிகளுக்காகவும் கணனிப் பயிற்சிகளுக்காகவும் எனக் கூறப்பட்டு பெண்கள் இராணுவத்தில் சேர்க்கப்பட்டதாகவும் ஆனால் பின்னர் இராணுவப் பயிற்சி வழங்கப்பட்டு இராணுவத் தேவைகளுக்குப் பயன்படுத்தலாம் என்ற தெரிய வந்ததனால் அந்தப் பெண்கள் விலகக் கோரியதாகவும் தெரிவிக்கப்படுகிறது.

Share This Post

DeliciousDiggGoogleStumbleuponRedditTechnoratiYahooBloggerMyspaceRSS